Mevlâna Hâlid-i Bağdâdî Şehrezorî Hazretlerinin ecille-i hulefâsından Hakkari-Şemdinan Nehrili Şeyh/Seyyid Taha (Vefatı:1269/1853) Efendizâde A'yân Hey'eti a'zâsından Seyyid Abdülkâdir Efendi'nin pederi Şeyh/Seyyid Ubeydullah Efendi zamanında devrin İran hükümeti tarafından gasp olunan karye/köy ve arazilerinin istirdadı hususunda Sadâret/Sadrazamlık makâmına arz ettiği 25 haziran 1325/8 Temmuz 1909 Tarihli kendi mührüyle bir arîzası.

 

Mevlâna Hâlid-i Bağdâdî Şehrezorî Hazretlerinin ecille-i hulefâsından Hakkari-Şemdinan Nehrili Şeyh/Seyyid Taha (Vefatı:1269/1853) Efendizâde A'yân Hey'eti a'zâsından Seyyid Abdülkâdir Efendi'nin pederi Şeyh/Seyyid Ubeydullah Efendi zamanında devrin İran hükümeti tarafından gasp olunan karye/köy ve arazilerinin istirdadı hususunda Sadâret/Sadrazamlık makâmına arz ettiği 25 haziran 1325/8 Temmuz 1909 Tarihli kendi mührüyle bir arîzası.

 

 

 

Huzûr-i Cenâb-ı Sadâret-penâlerine

 

Fehâmetlu, Devletlu, Efendim Hazretleri

 

Devlet-i Aliyye-i Osmâniye ile İran hükümeti arasında muhtelif fîh olan mıntıka-i hudûdiyenin Mergivar, terekvar, Soma, Biradost, Eşnev kazâ ve nâhiyeleri dâhilinde pederim merhûm Seyyid Ubeydullah Efendi’nin elde bulunan vesâik-i resmiye mucebince elii üç (53) pâre karyenin mülkiyet ile mutasarrıfı olduğumuz emirnâmeler ile müeyyed bulunmuştur. Bin iki yüz doksan sekiz (1298) sene-i Hicriyesine kadar emlâk-ı mezkûre yed-i tasarrufumuzda olup âdât-ı kadîme-i mahalliyeye tevfikan istifâde ve intifâ’ etmekte iken târîh-i mezkûrda İran hükümeti emlâk-ı mebhûs-i ‘anhâyı fuzûli olarak işgâl ve zabt ve hukûk-i tasarrufiye-i dâ’îyânemizi cebren gasb ettiği gibi a’mâl-i nüfuz ederek pederim merhum ile beraber dâ’îleri dahi Mekke-i mükerreme’ye tağrîb ettirmeğe muvaffak olmuştur. Yirmi sekiz seneden beri havâl-yi mezkûrede ikâmet etmekte olup bu müddet zarfında hükümet-i şâhî emlâkimize vaz’-ı yed edip bir takım hânlara verdiğine binâen, hukûk-i meşrû’amızın istirdâdı istirhâmına dâir üç yüz on iki (1312) târihinde Bâb-ı Âlî’ye resmen müteaddid müsted’ayât takdîm ederek da’vâ ta’kîb olunmakta iken bitekrâr Medîne-i Münevvere’ye tağrîb olunduğumuzdan da’vâ yüzüstü kalmıştır. Geçen sene hükümet-i Osmâniye emlâkimizin kâin bulunduğu mıntıka-i menâzi’-i fîhâyı işgâl etdiği misillu dâ’îleri de kânun-i Esâsî’nin iâdeten te’sisi sâyesinde Dersaâdet’e avdet eylediğimden emlâk-ı mezkûremize yeniden sahib oldum. Hukûk-i tasarrufiyemiz gayr-i kâbil-i i’tirâz bulunduğu ve Hükümet-i İraniye tarafından gasb olunduğu cihetle, bu mu’âmelenin mes’ûliyetiyle bunca zamân mahrûm kaldığım hâsılâtın tazmini mecbûriyetinin hükümet-i mezkûreye âidiyeti derkârdır. İşbu hâsılât-ı senevisi yirmi iki bin (22000) lira bâliğ olmakta bulunduğundan yirmi sekiz (28) seneliği altı yüz onaltı bin (616000) liralık bir yekün teşkil etmekte ve emlâk-ı mezkûre elyevm harâb bir hâlde olup gasb olunduğu zamânki hâline ifrâğı içün elli bin (50.000) lira iktizâ eylediği hasebiyle cem’an zararımızın yekünü fâizinden maâda altı yüz altmış altı bin (666.000) liraya resîde olmaktadır. İşbu meblağın hükümet-i Şâhîden taleb olunması ve bu meblağın te’mîn-i tesviyesiyle hukûk-i dâ’iyânemizin bir suret-i müessire ve sahîhada muhâfazası içün lâzım gelen tedâbîrin ittihâzını hükümet-i meşruta-i âdileden taleb ve istirhâm eylerim. Ol bâbta ve herhâlde emr u fermân hazret-i veliyyu’l-emrindir.

 

Fi 20 Haziran Sene 1325

 

Ed-Dâ’î

 

Hey’et-i A’yân A’zâsından Merhûm Şeyh Ubeydullah Efendizâde

Mühür:  Seyyid Ubeydullahzâde Abdülkâdir