Arnavutluk-Tiran’da Hacı Edhem Bey Câmi-i Şerîfi Kitâbeleri ve Çevirileri

 

Arnavutluk-Tiran’da Hacı Edhem Bey Câmi-i Şerîfi Kitâbeleri ve Çevirileri

1209/1794-95 Tarihli İnşâ Kitâbesi

جناب مير اعظم صاحب الخيرات ملّا بگ

ايدوب طرح اساسيله عبادتگاه جانبخشا

او مير بوالكرم همجاه عاليهمّتڭ جودي

بو درگاهڭ بناسيله بو شهری ايلدي احيا

شرفياب اولدي اتماميله اشبو قبّه نڭ ليكن

موفّق اولمدي اتمامنه مناره نڭ امّا

دخي تكميل و تزيين اتمدن عزم بقآ قلدي

خدا جانڭ جنانده دمبدم شاد ايده بي بروا

زهی درگاه دلكش زيورافزای بلدرركم

مفرّح جايگاهده اولدی طاعتگاه غمفرسا

ديدي تأسيسنڭ بو جامعڭ تاريخني مذنب

ضيائی عين اهل دل اولوب بو جامع زيبا

سنه ١٢٠٩

Cenâb-ı mîr-i a’zam sâhibu’l-hayrât Molla Beğ

İdüp tarh esasıyla ibâdetgâh-ı can-bahşâ

O mîr-i bû’l-kerem hemcâh-ı âlîhimmetin cûdı

Bu dergâhın binâsıyla bu şehri eyledi ihyâ

Şerefyâb oldı itmâmıyla işbu kubbenin lâkin

Muvaffak olmadı itmâmına minârenin ammâ

Dahî tekmîl u tezyîn etmeden azm-ı bekâ kıldı

Hüdâ cânın cinânda dembedem şâd ide bî pervâ

Zehî dergâh-ı dil-keş zîver-efzây bildirir kim

Müferrih câygâhda oldı tâatgâh-ı ğam-fersâ

Dedi te’sîsinin bu câmi’in târîhini müznib

Ziyâî ayn-ı ehl-i dil olup bu câmi-i zîbâ

Sene 1209

Arnavutluk-Tiran’da Hacı Edhem Bey Câmi-i Şerîfi Ve Kitâbeleri-2

Caddeye Bakan Kapısında Yer Alan 1236/1820-21 Tarihli Tâmir Kitâbesi

مكارمكار بوالخيرات كان لطف منلا بگ

خلوص نيتيله بوڭله خيره ايلدی آغاز

اساسين طرح و قبّه نڭ بناسين ايليوب تكميل

ولی اولاميوب بيرون و اندروننه بر همين ساز

ديدم بآمد بسم الله مجوهر تاريخ رحلت

صفآگاه جنانه مرغ روحی ايلدی پرواز. سنه ١٢٢٣

بحمدالله عرفان و كمال جاه و دولتله

بو دم مخدومی تاجی بگ يرينی ايلدی احراز

بو جامعين مناره سين نقوش و سقف و صفه سين

موفّق اولدی ختامينه اوقونور خمسه يه آواز

بنانڭ طرح تأسيسنه كم اتمامنه تاريخ

ايدوبدر خامۀ سوزی برر مصرعلرين پرداز

بو جامع عجيب ايلمش عاليقيمتين روح فزا ١٢٠٩

قلوب مانند آيا صفيه بو شهری محاسن ساز ١٢٣٦

Mekârimkâr-ı bû’l-hayrât kân-ı lütf Monla Beğ

Hulûs-i niyetiyle bunla hayra eyledi âğâz

Esasın tarh ve kubbenin binâsın eyleyüp tekmîl

Velî olamayup bîrûn ve enderûna ber-hemîn sâz

Didim be-âmed-i Bismillâh mücevher târîh-i rihlet

Safâgâh-ı cinâna mürğ-i ruhı eyledi pervâz. Sene1223

Bihamdillâh irfân u kemâl-ı câh ve devletle

Bu dem mahdûmu Tâcî Beğ yerini eyledi ihrâz

Bu câmiin minâresin, nukûş ve sakf u sofasın

Muvaffak oldı hitâmına okunur hamseye âvâz

Binânın tarh-ı te’sîsine kim itmâmına târîh

İdübdür hâme-i Sûzi birer mısra’ların perdâz

Bu câmi-i acîb eylemiş âlîkıymetin ruh-fezâ 1209

Kılup mânend-i Ayasofya şehri mehâsin-sâz 1236

Arnavutluk-Tiran’da Edhem Bey Câmi-i Şerîfi Ve Kitâbeleri-3

Edhem Bey Cami-i Şerîfi Önündeki Tek Kalan 1270/1853-54 Tarihli Kadın Mezar Taşı Kitâbesi

هوالغفورالرّحيم

زوجة الحاجی ادهم بگ طاهر پاشا قيزی

بلقيس خانم اول...نام شمس لقاء

اوتوز اوچ ياشنی تمام ايتمگن ناگهان

گوشنه گلدی خطابی ارجعي حقدن ندا

سويلدي رعنا رجائي تاريخي فوتن تمام

ايليه بلقيس خانم جنّتی بالای جا

سنه ١٢٧٠

Huve’l-Ğafuru’r-Rahîm

Zevcetu’l-Hâcc Edhem Beğ, Tâhir Paşa kızı

Belkıs Hanım ol…nâm-ı şems-likâ

Otuz üç yaşını temâm itmeğin nâgehân

Gûşuna geldi hitâb-ı İrci’î Hakk’dan nidâ

Söyledi ra’nâ Recâî târih-i fevtin tamâm

Eyleye Belkıs Hânım Cennet-i Bâlâ'yı câ

Sene 1270

Not: Mezar taşı yıpranmış olduğundan bir kelime okunamadı.

Bazı Fotoğrafları Gönderen Dostumuz Genti Kruja'ya Teşekkürler.