Birleşik Arap Emirliklerini Oluşturan Ahsa Ve Necd Aşiret/Kabile Reis Ve Şeyhlerine Osmanlı Döneminde Ödenen Maaşlarla İlgili Başbakanlık Osmanlı Arşivindeki Belgeler Ve Maaş Çizelgesi
Ahsa Ve Necd Aşiret/Kabile Reis Ve Şeyhlerine Osmanlı
Döneminde Ödenen Maaşlarla İlgili Başbakanlık Osmanlı Arşivindeki Belgeler
جدول\قائمة الرواتب العثمانية الی رؤساء و مشائخ العشائر و القبائل النجدية كبني عجمان، بني مُرة و بني هاجر
BOA
DH.MUİ
54-1/13
30/Z/1327
UMUM ERKAN-I HARBİYYE DAİRESİ
ÜÇÜNCÜ ŞUBESİ
Altıncı Ordu Kumandanlığına
Şifre Halli
C. Fi 30 Mart Sene 1325 Vusûlü 17 Nisan Sene 1325
Hıtta-i Necdiye’nin El-Ahsa kıt’asındaki bellibaşlı aşâir-i bedeviye yedi
müteaddid fırkalardan mürekkep El-Acmân, El-Mürre, Benî Hâcer, Benî Manâsîr, ve
Katîf havâlisindeki Benî Hâlid aşâir-i cesîmesinden ibâret ve başlı belli
olmayan birçok küçük fırkalardır. El-Acmân firak-ı muhtelifesinin ileri gele
rüesâsı evâilinden beri buranın belediyesinden üçyüz (300)’den altı yüz (600)
kuruşa kadar maâş aldıkları gibi El-Mürre’nin de hakeza, rüesâsı da üç yüz
(300) kuruş nisbetindeki maâş-ı muhassaslarını almakda oldukları ve aşireteyn-i
mezkurenin de sâlifu’z-Zikr ashâb-ı maâş olanlarıyle ikinci ve üçüncü
derecedeki rüesâları fırkalarıyla ber mu’tâd mevsim-i vaktinde yâni beher sene
hurmanın idrâk ettiği zaman ki Haziran Temmuz ibtidâlarından Teşrîn-i Evvel’in
gâyesine değin bir ay hesabla Hufûf’un etraf ve civârına peyderpey nüzul ve
ictimâ’ ettikleri vakit ashâb-ı maâşâtın matlubât-ı müterâkimeleri derece-i
sâniyede olan rüesâların da beher sene maktû’an almaları mu’tâd olan hakk-ı
iksâiyeleri ki, ‘ala derecâtihim on (10) riyâlden elli (50) riyâle kadar
mebâliğin belediyeden verilegeldiği anlaşılmış ve Hâcerîlerden ve Mansûrîlerden
bir-iki şeyhlerine Basralı Tâlib Bey Efendi’nin Necid’te mutasarrıflığı
zamanında hükümete olan hizmetlerine binâen hod be hod mâliyeden tahsis ettiği
maâşların bir sene sonra kesilmiş olmasından dilgîr olan mezkur rüesâ ve
manâsîrliler emsâllerine bakarak huylanıp fırsat buldukça yollara tecâvüze
mutasaddi olmalarının siyâseten men’i zımnında geçen sene Hâcerî ve Manâsır
rüesâsına belediyeden bir mikdâr maktû’ verilmiş ise de bununla kanaât
etmeyerek emsâlleri ve sâbıkı misillu maâş tahsisi dilemekde oldukları
anlaşılmış ve sevâhil-i Necdiyye ve Katar’la Muskat’dan evvel ve âhir ithâl
edilmiş olan peyklerle esliha-i cedîde ile müsellah gâyet nişâncı silahşör ve
cesûr takımından olan mezkur aşâir-i cesîme-i bedeviyenin sâlifu’z-zikr rüesâsı
muhassasât-ı ve âidât-ı kadîmelerine bir taraftan veya bir me’murdan cüz’î bir
nakîse ârız veya kendilerine ahâli-yi belde veya me’murân tarafından nefs-i
memleketde bigayri hakkın taâdâd-ı tahkir vâkî olduğu ve her bâr isti’mâl-i
tedâbir ve siyâsetle idâre olunmadıkları takdirde husûl-i maksad ve ahz-i
intikam sevdasıyla bilhassa Uceyr yoluna şitâb ile oradan gelip geçenleri ve
serî’alarla kâfileleri soymağa tasaddi eyledikleri emsâl-ı kesîresi delâletiyle
müsbet bulunmuş olmağla ma’ruzdur.
Fi 22 Nisan Sene 1325 Hufûf’a vusulü Fi 1 Mayıs Sene 1325
Necid Kumandan Vekîli
Hakkı
UMUM ERKAN-I HARBİYYE DAİRESİ
ÜÇÜNCÜ ŞUBESİ
Sûretidir
Altıncı Ordu-yu Hümayun kumandanlığının 30 Mart Sene 1325
tarihli telgrafnâmesine zeylen şerefmevrud 1 Nisan 1325 tarihli tahrirat-ı
aliye-i cenâb-ı vilâyet-penâhîleri üzerine keyfiyet Necd kumandanlığıyle
muhasebeciliğinden isti’lâm olunmuş ve alınan cevâbiyenin bir sûreti leffen
takdîm kılınmıştır. Kumandanlığın iş’arı maâşât ve ahvâl-i hâzırayı mübeyyin
olmasından ve ordu kumandanlığından aranılan izahât ise evvelce mal sandığından
mahsûs olduğu halde ahîren kat’olunan maâşâta âit bulunmasından dolayı suâl-i
vâkıa kâfî olmadığı cihetle bundan bahs etmeğe hâcet yoktur. Muhasebecinin
tezkire-i cevâbiyesinde gösterildiği üzere urbân meşâyihinin maâşâtı açıktan
açığa tâbir-i sahihle vaktiyle hırsızlık tarîkıyle emvâlden alınarak te’diye
olunmakda bulunduğu anlaşılmış ve mamafih urbân-ı merkumenin Uceyr yoluna olan
tasallutlarının men’i için belediye vâridâtından bir mikdâr maâşlar tahsis
olunduğu gibi rusûm-i erbaanın bu kere belediyeye terk olunmasından nâşî
maâşât-ı mezkure mal sandığından i’tâsına müsaâde olunmadığı takdirde mahza
emniyet ve istirahât-ı umumiyenin te’mini için belediye hâsılâtından
te’diyesine devâm olunacağının arz ve beyânına cür’et kılınmış olmağla bâbında…
BAB-I ALİ DAİRE-i SADARET
TAHRİRAT KALEMİ
2963
Saâdetlu Efendim Hazretleri
15 Mart Sene 1325 tarihli tezkireye zeyldir El-Ahsâ
Meşâyihinden evvelce kimlere maâş tahsis olunmuş ve bu maâşât ne vakitten beri
ve neden dolayı kat’edilmiş olduğuna dâir sabk eden izâha cevâben Basra vilâyet
ve kumandanlık ile Necid (Necd) kumandanlık vekâletinden alınan cevâb
sûretlerinin gönderildiğini ve bâzı ifâdâtı mutazammın Harbiye Nezâret-i
aliyyesinden gelen 15 Kânûn-i Evvel Sene 1325 tarihli ve 2354 numaralı tezkire
melfuflarıyla savb-ı vâlâlarına irsâl kılındı. Mezkur meşâyihe mukaddema
belediye tahsisâtından maâş verilegelmekte olduğu hâlde bilahare kat’ı cihetine
gidilmesi su’-i te’sirât ve şikâyâtı müstelzim olduğu sûret-i iş’ardan
anlaşılmasına nazaran bunlara kema fi’s-sâbık devâir-i belediye tahsisâtından
birer mikdâr maâş i’tâsı zımnında vilâyetle bâ muhâbere iktizâsının ifâsına
himmet olunması siyâkında tezkire-i hulûsverî terkim olundu.
Fi 21 Zilhicce Sene 1327 Fi 21 Kânûn-i Evvel Sene 1325
Sadrâzam
(İmza)
DAHİLİYE NEZARETİ MUHABERAT-I UMUMİYE DAİRESİ
Evrak Numarası: 2963
Kaleme Vurûdu Tarihi: 23
Müsevvidi: Mahmud
Mübeyyizi: Mahmud
Tarih-i Tesvid: 27 Kânûn-i Evvel Sene 1325
Tarih-i Tebyiz: 30 Kânûn-i Evvel Sene 1325 30 Zilhicce Sene
1327
Basra Vilâyet-i Behiyyesine
El-Ahsâ meşâyihinden bâzısına mukaddema belediye
vâridâtından maâş verilegelmekde olduğu hâlde bilahare kat’ı cihetine gidilmesi
sû’i te’sirât ve şikâyâtı müstelzim olduğu cereyan eden muhâberâtdan
anlaşılmasına nazaran bunlara kema fi’s-Sâbık devâir-i belediye vâridâtından
birer mikdâr maâş i’tâsı zımnında vilâyet-i behiyyeleriyle bilmuhâbere icrâ-yı
icâbı bâ tezkire-i sâmiye izbar buyurulmağla bu bâbda vilâyet-i behiyyelerine
olan mâlumât ve muâmelenin ilâve-i mutalaa-i vilâyet edilmesi bâbında ber
muceb-i iş’ar-ı sâmî iktizâsının ifâsına himmet
UMUM ERKAN-I HARBİYYE DAİRESİ
ÜÇÜNCÜ ŞUBESİ
4354
Hülâsa: El-Ahsa meşâyihine verilen maâşâta ve bunları
zaman ve suret-i kat’ine ve sevâhil-i Necdiyye için Ganbot ve nakliye vapuru
i’zâmına dâir
Mâruz-ı çâker-i kemîneleridir ki,
14 Mart Sene 1325 tarih ve yüz altmış dokuz (169)
numaralı tezkire-i starih ve yüz altmış dokuz (169) numaralı tezkire-i sâmiye-i
fahîmâneleri cevâbıdır. El-Ahsâ meşâyihinden kimlere maâş tahsis edilmişve bu
maâşât ne vakitten beri ve neden dolayı kat’edilmiş olduğunun istizâhına dâir
vâkî olan iş’ar-ı mesbûk-ı çâkerîye cevâben Basra vilâyetiyle kumandanlığının
ve Necd kumandanlığı vekâletinden buna dâir alınan cevâb suretlerinin leffiyle
bu kere Altıncı Ordu-yı Hümayun kumandanlığı vekâletinden mevrûd tahrirâtın
fıkra-i ahîresinde sevâhil-i Necdiyye için mukaddema taleb edilen ve evvel ve
âhir ‘arz-ı huzur-ı Sâmîleri ganbotla nakliye vapuru hakkındaki elzemiyet ez
ser ….te’kîd edilmiş ve maâşât-ı mezkureye dâir olan sâlifu’z-Zikr evrâkın
suretleri leffen takdim kılınmış olmağla ol bâbda emr u fermân hazret-i
veliyyu’l-Emrindir.
Fi 15 Zilhicce Sene 1327 Ve Fi 15 kânûn-i Evvel Sene 1325
Harbiye Nâzırı
İmza
UMUM ERKAN-I HARBİYYE DAİRESİ
ÜÇÜNCÜ ŞUBESİ
Surettir
Altıcı Ordu-yı Osmanî Kumandanlığı Vekâlet-i ‘Aliyyesine
Necid meşâyihinin maâşâtı hakkında Fi 30 Mart 1325 tarihli
telgrafnâme-i âlî-yi kumandânîleri üzerine edilen tebligâta cevâben Necid
mutasarrıflığından alınan 26 Ağustos 1325 tarihli ve yüz doksan beş (195)
numaralı tahrirâtla melfufâtı, tafsilât ve izahâtı hâvî olmak cihetiyle suret-i
muhreceleri muhasebe-i vilâyet ifadesiyle leffen irsâl kılınmakla ol bâbda emr
u irâde men lehu’l-Emrindir.
Fi 19 Ramazan Sene 1327 Ve Fi 21 Eylül Sene 1325
Basra Vâli Vekîli
Ed-Dâ’î: Râkım
UMUM ERKAN-I HARBİYYE DAİRESİ
ÜÇÜNCÜ ŞUBESİ
Suretidir
Necid Muhasebeciliğinin 18 Ağutos Sene 1325 Tarih ve
Yirmi Yedi (27) Numaralı Tezkire-i Cevâbiyesi Suretidir
Tebcîlen şereftealluku olunan yüz elli dokuz (159) numaralı
ve Fi 9 Ağustos 1325 Tarihli tahrirât-ı âlîleri üzerine tedkikât ve tetebbuât-ı
kuyûdiyyeye binâen El-Ahsâ aşâir-i bâdiyesi meşâyihine verilen maâşât hakkında
oldukça istihsâl olunan mâlumât mukarrerât vechile pusulası leffen takdim
kılınmıştır. Meşâyih-i merkumeye tahsis olunan maâşât doksan bir (1291)
senesinde vâkî olup tarih-i mezkurdan üç yüz on beş (1315) senesi gâyesine
kadar senevî verilen otuz üç bin (33000) kuruş livanın senetleri ihtisâb-ı deve
rusûmu hâsılâtından açıktan açığa ihâle ve emâneti defâtirinden tenzîl
suretiyle verildiği ve üç yüz on altı (1316) senesinden maâşât-ı mezkurenin mal
sandığından kat’ı hakkında meclis-i idâre-i livâdan verilen elli bir (51)
numaralı Fi 15 Mayıs 1319 tarihli karâr mucebince üç yüz on dokuz (1319) senesi
nisanı nihâyetine değin rusûm-i mezkureden tesviye edilen yetmiş altı bin üç
yüz elli bir (76351) kuruş dahi kezâlik sandık defâtiri hâricinde olarak irâd
ve masrafı mevkûf tutulduğu anlaşılmasından muâmele-i mesbuka-i mâruzanın
netice-i tedkikâtı makâm-ı âlî-yi defterdâriye derdest-i ‘arz ve tafsil
bulunmuş ise de husus-ı mezkura dâir gerek vilâyet-i celileden şerefvurûd ve
gerek buraca cereyan eyleyen muamelât ve mukarrerât-ı mahalliye muhabere
evrakının evrakdan rabtıyla münderecâtlarına nazaran ifâ-yı muktezâsı merhun-i
re’y-i ‘âlî-yi mutasarrıf-ı ekremîleridir. Ol bâbda..
UMUM ERKAN-I HARBİYYE DAİRESİ
ÜÇÜNCÜ ŞUBESİ
Surettir
Necid Kumandanlığı Vekâletinin 14 Numaralı Ve Fi 9
Ağustos 1325 Tarihli Tezkire-i Cevâbiyesi Suretidir
Şerefresi-yi mevkî’-i terkîm ve ihtirâm olan Fi 9 Ağustos
Sene 1325 Tarih ve 158 numaralı tezkire-i saâdetlerine ‘arz-ı cevâbîdir. Bu
bâbda ordu-yu hümayun kumandanlığından âcizlerine de şerefmevrûd telgrafnâmenin
‘arîza-i cevâbiyesi sûret-i musaddakası leffen takdim kılınmış ve mütalaâ ve
ittilaât-ı âcizi bu merkezde bulunmuş olmağın ol bâbda emr u irâde hazret-i men
lehu’l-Emrindir.
UMUM ERKAN-I HARBİYYE DAİRESİ
ÜÇÜNCÜ ŞUBESİ
Surettir
Ordu-yu Hümayun Kumandanlığına
C. 10 Mayıs Sene 1325 Ahsâ meşâyihinin maâşâtı hakkındaki emirleri vilâyete yazıldı. Necid mutasarrıflığının teşkili sırasında hikmet-i hükümet icâbından olarak aşâirin hükümet-i seniyyeye olan râbıtaları bir kat daha t’eyid edilmek maksadıyle El-Acmân, El-Mürre ve daha bu gibi kuvvetli kabâil rüesâsına haysiyetleri nisbetinde maâşlar tahsis olunmuş idi. Bilahare su-i isti’malâta uğratıldığından kabâil ve aşâirin işbu râbıtasına halel gelmiştir. Vaktiyle bu hususlar hakkında taraf-ı âcizîden tertib ve orduya takdim edilen lâyiha ve harita vesâire ordunun erkân-ı harbiyesinde mevcud bulunmak lâzımgeldiği mâruzdur. Ferman.
Fi 13 Mayıs Sene 1325 Vusulü: 21 Mayıs
Basra Kumandan Vekîli
Mirlivâ: Şâmil
UMUM ERKAN-I HARBİYYE DAİRESİ
ÜÇÜNCÜ ŞUBESİ
Surettir
Ordu-yu Hümayun Kumandanlığına
C. Ahsâ kabâili meşâyihinin muhasebe-i vilâyetde
kayıtları bulunmadığı ve taraf-ı Sâmîlerinden makâm-ı vilâyete şerefmevrûd Fi
30 Mart 1325 tarihli şifre-i telgrafnâme üzerine icâbı Necid mutasarrıflığına
iş’ar olunacağı vilâyetin cevâbı üzerine mâruzdur.
Fi 28 Mayıs Sene 1325 Vusûlü 1 Haziran
Basra Kumandan Vekîli
Mirlivâ: Şamil
UMUM ERKAN-I HARBİYYE DAİRESİ
ÜÇÜNCÜ ŞUBESİ
Sûretidir
Acmân Meşâyihinden
400 Tarih-i Tahsisi Sene 1291
Asl-ı Maâş Azzâm bin Hâlife, Gâye-i Teşrîn-i Sânî 1316
KendisineVerilmiştir. Vefatından Sonra Muhammed bin Kilâb’a intikâl ile An
Kânûn-i Evvel Sene 1316 Be Gâye-i Kânûn-i Evvel Sene 1318
Bu Dahi
300 Tarih-i Tahsisi Sene 1291
Asl-ı Maâş Leyl bin Nehâr, Gâye-i Şubat Sene 1316 Mâaş Almış
Vefatından Sonra Mahdumu Abdullah bin Leyl An Mart Sene 1315, Yerine
Abdullah’ın Biraderi Nehâr bin Leyl An Mart Sene 1316
Bu Dahi
300 Tarih-i Tahsisi Sene 1291
Asl-ı Maâş Mansûr Menhîr’e Tahsis Edilmiş. Tarih-i
Tahsisinden 1319 Senesi Nisanı Gâyesine Kadar Maâş Verilmiştir.
Bu Dahi
300 Tarih-i Tahsisi Sene 1291
Asl-ı Maâş Şelâbeş bin Hacirf’e Tahsis Edilmiş. Gâye-i Şubat
Sene 1316 Kendisine Verilmiş, Vefatından Sonra Oğlu Fellâh bin Şelâbeş’e Mart
Sene 1317 Begâye-i Mart Sene 1319 Maâş Tesviye Edilmiştir.
Acmân Aşireti Meşâyihinden
150 Tarih-i Tahsisi Sene 1291
100 Muahharen Meclis-i İdâre-i Livânın 149 Numaralı Ve 22
Eylül 1318 Tarihli Kararı Mucebince Maâşına 100 Kuruş Zamm Edilmiştir. İtibâren
Teşrin-i Evvel Sene 1318
Asl-ı Maâş Mükerreren Tahsis Edilmiş. Gâye-i Teşrin-i Evvel
Sene 1316 Maâş Almış. Vefatından Sonra Zahra İntikâl İle An Teşrin-i Sânî Sene
1316 Ligâye-i Şubat Sene 1318 Maâş Tesviye Edilmiştir.
El-Mürre Meşâyihinden
300 Tarih-i Tahsisi Sene 1291
Asl-ı Maâş Abdurrahman bin Tekbirân’a Tahsis Edilmiş.
Tarih-i Tahsisinden 1319 Senesi Nisanı Gâyesine Kadar Tesviye Edilmiştir.
Acmân Mesned-i Meşâyihinden
400 Tarih-i Tahsisi Sene 1291
Asl-ı Maâş Reykân Fellâh’a Tahsis Edilmiş. Gâye-i Şubat Sene
1312 Merkuma Verilmiştir. Vefatından Sonra An Mart Sene 1312 Ligâye-i Şubat
Sene 1312 Oğlu Fellâh’a An Mar Sene 1316 Begâye-i Şubat Sene 1316 Fellâha Oğlu
Hâlid’e Ve Onun Yerine An Mart Sene 1317 Begâye-i Nisan Sene 1319 Muhammed bin
Cesf’e Maâş Verilmiştir.
El-Mürre Meşâyihinden
300 Tarih-i Tahsisi Sene 1291
Câbiru’l-Murhaf’a Tahsis Edilmiş. Tarih-i Tahsisinden 1317
Senesi Ağustosu Gâyesine Kadar Maâşâtı Verilmiştir.
Bu Dahi
300 Tarih-i Tahsisi Sene 1291
Asl-ı Maâş Muhammed Şer’î’ye Tahsis Edilmiş. Tarih-i
Tahsisinden 1319 Senesi Nisanı Gâyesine Kadar Maâş Tesviye Edilmiştir.
Muhâsebe-i Livâ-yı Necd Fi 18 Ağustos Sene 1325
İşbu Pusula Necid Muhâsebeciliğinin 27 Numaralı Ve 18
Ağustos Sene 1325 Tarihli Tezkire-i Cevâbiyesinin Melfûfu Olup Aslına
Mutâbıktır.
Yorumlar
Yorum Gönder