Makedonya, Tetovo/Kalkandelen’deki Alaca Mescid/ Xhamia e Alaxha Tetovo Ve 1253/1837 Tarihli Kalkandelen/Tetovolu Mirmiran/Beylerbeyi Abdurrahman Paşa’nın Manzum İhyâ/Tecdîd Kitâbesi

Makedonya, Tetovo/Kalkandelen’deki Alaca Mescid/ Xhamia e Alaxha Tetovo Ve 1253/1837 Tarihli Kalkandelen/Tetovolu Mirmiran/Beylerbeyi Abdurrahman Paşa’nın Manzum İhyâ/Tecdîd Kitâbesi

Alaja Jami-Mosque/Xhamia e Alaxha In Tetovo-Macedonia And Its Inscription Of Renewal In 1253/1837 By Abdurrahman Pasha The Ottoman Governer Of Tetovo

داور كرّار خصلت نامداش ابن عوف
امر بالمعروفه مقدم منكراتڭ مانعی
ميرميرانڭ كباری عبدالرحمن پاشا كم
اولمش احسانيله اصحاب كرامڭ تابعی
خاندان سربلند و حامئ قالقاندلن
فضيل و جعفر خاتمڭ جود و سخاده رابعی
خيرالمشرّب كريم المنقبت ذات گزين
عصرينڭ از هر جهت اودر امير قانعی
نشأتندن سمت خيراته سلوك ايتمكده در
لطفی يوميه مشبّع صد هذاران جايعی
همتی آثار خير انشاسنه مصروفدر
قلب پاكی هب مثوبات جزيله طامعی
اشته از جمله بو وآلا معبدی تجديد ايله
تا تملدن اولدی پوسيده بنانڭ قالعی
بر نوين بنايه صورت ويرديكم الحق بودر
بسط روحانيّت ايله هشت بهشتڭ تاسعی
بونده اوقوندقچه قرآن كريم اخلاصله
عرش اعلادن گرد بيان اولورلر سامعی
صنعت نقش و نگاريله مزيّن جملةَ
منبر و محرابه فرّ ويرمش رخام لامعی
دورخوآن محفل زيباسنی شآدان ايتمده
روخ پاك حضرت قرّای اكمل نافعی
روزه ده سير ايت قناديل و شموعڭ ضوئيدر
روزنندن پآرلايان برجسته نور ساطعی
قلسه لله آنده دو ركعت اولور بر زائری
اوزرندن نجه بيڭ دورلو بلانڭ دافعی
شمدی بولدی شان بونكله بلدۀ قالقاندلن
خلقنك گلسون صلآ در ساجدی و راكعی
مؤمنينه هر نماز اردنجه واجبدر دعا
صيت آمينی گذار ايتسون سمای سابعی
روز و شب ايچنده قلدقچه مصليلر نماز
هر مؤذنله امام اولدقچه صوتڭ رافعی
صاحب الخيرين ايده اقبآل ايله عمرين فزون
جمله اولآديله اخوانيله كونڭ صانعی
ذات پاكن دولت دارينه مظهر ايده حق
تا بمحشر گورمسون دنيآده امر فاجعی
بنده بويله نآدرۀ نورسم زيباسن گوروب
قلدی املآ كلك اعجازم بيان واقعی
قصد اجر ايله ستايشگوی لوح....
طبع صافم ايلدی پاشيده درّ نابعی
سيفيا گتدكچه بش وقته ديسون تاريخی ناس
عبدالرحمن پاشا رنگين ياپدی بو نو جامعی
ما شاء الله
اثر خامۀ درويش محمّد مرادی
١٢٥٣

Dâver-i Kerrâr haslet nâmdaş-ı İbn-i Avf
Emr-i bi’l-ma’rufa mukaddim münkerâtın mâni’i
Mîrmîrânın kibârı Abdurrahman Paşa kim
Olmuş ihsânıyla ashâb-ı kirâmın tâbi’i
Hânedân-ı ser-bülend ve hâmi-yi Kalkandelen
Fudayl u Ca’fer ü Hâtem’in cûd u sehâda râbi’i
Hayru’l-müşerreb kerîmu’l-menkabet zât-ı güzîn
Asrının ez her cihet odur emîr-i kani’i
Neş’etinden semt-i hayrâta sülûk etmekdedir
Lütfu yevmiye muşebbi’-ı sad hezârân-ı câyi’i
Himmeti âsâr-ı hayr inşâsına masrufdur
Kalb-i pâkı hep mesûbât-ı cezîle Tâmı’i
İşte ez cümle bu vâlâ ma’bedi tecdîd ile
Tâ temelden oldu pûsîde binânın kâli’i
Bir nevîn binâya sûret verdi kim El-Hakk budur
Bast-ı ruhâniyyet ile Heşt Behiştin Tâsi’i
Bunda okundukça Kur’ân-ı Kerîm ihlâsla
Arş-ı A’la’dan gerd-i beyân olurlar sâmi’i
San’at-ı nakş u nigârıyla müzeyyen cümleten
Minber u mihrâba ferr vermiş rühâm-ı lâmi’i
Devr-hân-ı mahfel zîbâsını şâdân etmede
Ruh-ı pâk-ı Hazret-i Kurrâ-yı Ekmel Nâfi’i
Rûzede seyret kanâdîl ve şumû’un zav’ıdır
Revzeninden parlayan berceste-i nûr-ı sâtı’i
Kılsa Lillâh anda dû rik’at olur bir zâiri
Üzerinden nice bin türlü belânın dâfi’i
Şimdi buldu bununla Şân belde-i Kalkandelen
Halkının gelsün salâdır sâcidi ve râki’i
Mü’minîne her namaz ardınca vâcibdir duâ
Sıyt-ı âmîni güzâr etsün semâ-yı sâbi’i
Rûz u şeb içinde kıldıkça musalliler namâz
Her müezzinle imâm oldukça savtın râfi’i
Sâhibu’l-hayrın ide ikbâl ile ömrün füzûn
Cümle evlâdıyla ihvânıyla Kevnin Sâni’i
Zât-ı pâkın devlet-i dâreyne mazhar ide Hakk
Tâ be-mahşer görmesün dünyada emr-i fâci’i
Ben de böyle nâdire-i nev-resm zîbâsın görüp
Kıldı imlâ kilk-i i’câzım beyân-ı vâkı’i
Kasd-ı ecr ile sitâyiş-gû-yi levh-i…….
Tab’-ı sâfım eyledi pâşîde dürr-i nâbı’i
Seyfiyâ gitdikçe beş vakte desün târihi nâs
Abdurrahman Paşa rengîn yapdı bu nev câmi’i (1253)
Maşâallah
Eser-i Hâme-i Derviş Muhammed Murâdî